© AFP D'Entreprise xAI vum Elon Musk huet den Internetsite Grokipedia lancéiert, deen als Konkurrent vun der Online-Enzyklopedie Wikipedia presentéiert gouf. Wikipedia gëtt vun enger Rei Republikaner an den USA als "ze lénks" an "ideologesch parteiesch" agestuuft. Se wier vu "lénksextreemen Aktiviste kontrolléiert", sou den Elon Musk am Joer 2024 op X. Mat der Versioun 0.1 goufen elo an engem Coup méi wéi 885.000 Definitiounen um neie Site Grokipedia verëffentlecht. Fir de Verglach ginn et op Wikipedia aktuell ronn siwe Milliounen englesch Wikipedia-Anträg. Net laang soll et daueren, bis an engem zweete Schratt d'Versioun 1.0 lancéiert géif, déi, wéi et an engem Tweet vum Elon Musk op X heescht, "zéng Mol besser wier wéi Wikipedia". D'Zil vum KI-Chatbot Grok a Grokipedia wier "d'Wourecht, déi ganz Wourecht an näischt anescht wéi d'Wourecht", sou de räichste Mënsch vun der Welt weider. https://t.co/op5s4ZiSwh version 0.1 is now live. Version 1.0 will be 10X better, but even at 0.1 it’s better than Wikipedia imo.